URA Uraren Euskal Agentziak Gobela ibaiaren aldameneko espazio publikoa jendarteari "itzuli" dio Errekagane inguruan, Itzubaltzeta/Romon; Cristobal Valdes hustubidetik Avanzadarainoko tartean. Izan ere, azken bi urteetan zehar, URAk espazio hori okupatuta izan du, Gobela ibaiaren hobetze hidraulikorako lanak egin ahal izateko: ibilgua berriztatzea ur-goraldietako urak husteko ahalmena lortzeko, eta, hartara, inguruan uholdeak saihesteko, alegia.
Lanon xedea izan da 400 metrotako tartean, hobetze hidraulikoa lortzea: horretarako, ibilgua 6 metrotik 11 metrora zabaldu da. Horri esker, ibilguak ur-hustuketarako ahalmena lau aldiz handiagoa izango du (lehen 35 metro kubiko; orain, ostera, 135 metro kubiko).
URAk azaltzen duenez, lanok zailtasunen bat edo beste izan dute. Izan ere, lurzoru hareatsuetan lan egin da; maila freatikoaz azpitiko indusketak ezinbestekoak izan dira; lan-eremua urri samarra izan da lanok egiteko; oinezko nahiz autoen trafikoaren norabideak behin baino gehiago aldatu behar izan dira, trafiko intentsitate handiko eremu bat izanda; eta, aldi berean, lan-ekimenak bateragarri egin behar izan dira ibaiaren emariaren aldizkako aldaketakaz.
Urtea amaitu aurretik, URAk lan-proiektuan aurreikusitako zuhaitzak landatuko ditu.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
