Duela aste batzuk, Algortako Iturribarri inguruko ortuak husteko agindua zuen gutuna jaso dute hango auzotarrek, "berehala martxan jarriko duten urbanizazio-prozesua dela eta". Hezetasuna Auzoko Bizilagunen Taldeak deia egin du udalerriko auzoen "nortasuna" sortzen duten eremu berdeak babesteko; hala, auzotarrei eskatu die balkoi eta leihoetan bandera berdeak eskegitzeko, "ados ez gaudela erakusteko, Udalari eta eraikuntza-enpresei". Era berean, jakinarazi dutenez, eguenero bilerak egingo dituzte San Nikolas ikastolaren aurrean 19:30ean.
Udalak jakinarazi duenez, 352 etxebizitza libre eta babes ofizialeko 147-223 inguru eraikiko dituzte, ezarritako eraikitze-tipologiaren arabera. Azaldu duenez, eraikinek lau solairuko altuera izango dute, eta eraikin arteko gutxieneko tartea 8 metrokoa izango da.
Irailaren 25a baino lehen landak husteko epea eman zien enpresak auzokideei; hala ere, auzotarrek tarte handiago eskatu dute uzta jaso ahal izateko, eta, dirudienez, epea urriaren 15era arte luzatzea adostu dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.