Horacio Echevarrieta Begoñako galerien jatorrizko jabea protagonista daukan "El ultimo magnate" pelikula-dokumentala astebete gehiagoz emango dute, ikus-entzuleen aldetik izandako harrera onaren ostean. Hala, martitzenean, hilak 27, eta eguenean, hilak 29 (euskaraz), proiektatuko dute arrastian, 19:30ean. Barikuan, berriz, 21:30ean izango da emanaldia; zapatuan, hilak 31, saio bi egongo dira, 19:30ean eta 20:30ean; eta domekan, azaroak 1, proiekzioa 19:30ean izango da. Emanaldia 12 urtetik gorako pertsonei dago zuzenduta eta saioan parte hartu ahal izateko erreserba aldez aurretik egin beharko da gaurtik aurrera, udal webgunearen bitartez, www.getxo.eus, edo Turismo Bulegora deituz: 94 491 08 00. Sarrera, doan da.
Saio berrietan nobedade bat ere izango da; udal iturriek adierazi dutenez, galerietako areto nagusian ipinitako ohetatik ikusi beharrean, leku berean jarriko diren 55 aulkietatik ikusiko da, emanaldi bakoitzeko edukiera handituz.
Jose Antonio Hergueta eta Olivier van der Zeek egina, "El ultimo magnate"-k Espainia eta Europako historia garaikideko gertakari ezezagun bati buruzko interesa pizten du, hain zuzen ere, E-1 itsaspeko modernoenaren eraikuntza, 1925 eta 1931 bitartean Kadizko ontziolan. Pelikula-dokumentalak Echevarrietaren bizitzaren begirada sakona eskaintzen du eta 1920ko hamarkadan Espainia eta Alemaniari, eta nazioarteko tratatu denen aurka, une hartako arma teknologiarik sofistikatuena egiteko aukera eman zien aliantza estrategikoa jorratzen du.
Dokumentalak Jose Maria Echevarrietaren lekukotasuna jasotzen du. Hura pelikularen protagonistaren semeetako bat zen eta 2013ko martxoan hil zen, 105 urte zituela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
