Bueltan dator Bizilagunak ekimena azaroaren 22an

Iker Rincon Moreno 2015ko urr. 22a, 16:03

130 bat lagunek parte hartu zuten iaz “Bizilagunak: aldameneko familia” ekimenean. © Getxoko Udala.

Hirugarren edizioa abiatuko du hurrengo hilean Bizilagunak ekimenak: bertoko familia «autoktonoak» eta bertakotutako atzerriko familiak bazkaltzeko elkartuko dira. Egizu Getxo Euskaldun elkarteak, Getxoko Udalak eta Getxoko Etorkinak Plataformak antolatuta, azaroaren 22ko bazkarian parte hartuko duten familien etxeetan izango dira oturuntzak, eta topaketa bakoitzean bertoko familia bat, atzerritik heldutako beste bat eta bazkaria antolatzen lagunduko duen dinamizatzaile bat elkartuko dira.

Bazkaria partekatzeaz gainera, familiek aukera izango dute euren errealitateez eta esperientziez berba egiteko, etxekoen arteko gune informalean.

Izen-ematea

Parte hartzeko edo dinamizatzaile izateko pertsona interesatuek izena eman beharko dute aldez aurretik. Normalean harremanik ez duten eta erreferentzia orokorrez elkar ezagutzen duten pertsonak elkartu ahal izango dira bazkarietan. Berba egiteko, hobeto ezagutzeko eta herri berean bizi diren pertsonen arteko zubiak eraikitzeko guneak sortzen lagundu gura dute ekimenagaz.

Bestalde, hurrengo abenduaren 5ean Bizilagunak jaira joateko aukera ere izango dute parte-hartzaileek. Donostiako Victoria Eugenia Antzokian izango da, Euskal Autonomia Erkidegoko familia parte-hartzaile guztiakaz. Iaz 130 lagun inguruk parte hartu zuten, egindako 15 bazkarietan.

Jendartea Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun