Getxoko Udalak terrorismoaren biktima "guztien" omenezko urteko ekitaldia egin du gaur, eguaztenean. Gorazarre egiteko ekitaldi hori 2009ko martxoaren osoko bilkuran akordioa lortu zenez geroztik egiten da. Ekimenean izan dira Udalbatzan parte hartzen duten alderdi politiko guztietako ordezkariak, EH Bildukoak izan ezik. Koalizio abertzaleak azaldu duenez, ez dute ekimen horretan parte hartu, ezta kaleratutako adierazpenagaz bat egiten, hori EH Bildu Osoko Bilkuraren parte ez zenean onartu zelako eta "ez duelako ordezkatzen gaur egungo ez Osoko Bilkuraren ahotsa ezta egun bizi dugun egoera ere". Era berean, "indarkeria mota guztiek eragindako biktima guztiak" aintzat hartu behar direla aldarrikatu dute; hori horrela, gaurko omenaldian hori ez dela bete salatu dute.
EH Bilduk adierazi du jarrera inklusiboa eta ez baztertzailea duen eta indarkeria guztien isla den adierazpen edo ekimen baten aldeko gogoa, "eta horregatik aspaldi hasi ginen lanean eta horrela adierazi genion EAJri", azaldu dutenez.
Udalak jakinarazi duenez, gaurko ekitaldiari beste bi gehitzen zaizkie: batetik, Espainiako Gerra Zibilaren, lehenagoko gatazka zibilen eta frankismoaren biktimak gogoratzeko otsailean egin zen omenaldiari; eta bestetik, joan den azaroaren 10ean izandako Oroimen Egunari. Adierazi dutenez, "egun horretan gaitzesten dira ETAk, beste terrorismo batzuek eta iraganeko beste indarkeria batzuek eragindako giza eskubideen urraketak".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
