Getxoko Zurrumurruen kontrako Estrategiak "Zurrumurruekin amaitu" izeneko jarduera antolatu du Gabonetarako. Ekimen berri horregaz, udalerriko hainbat tokitan hamar bat postontzi jarriko dituzte, herritarrek datorren urterako desagerrarazi nahi dituzten zurrumurruak, aurreiritziak eta estereotipo negatiboak paper batzuetan idatzita bertan sartzeko. Ontziak hilaren 22ra arte egongo dira jarrita ikastetxeetan, Gaztelekuan, Fadura kiroldegian, liburutegietan eta Villamonteko kultur etxean, besteak beste.
Abenduaren 24an, goizean, udalerri osoan batutako paper guztiak bilduta izango dituen ontzi bat jarriko dute Algortako Telletxe plazan. Gauean, berriz, jasotako aurreiritzi guztiak erreko dituzte, Olentzero erretzeko suan, San Nikolas plazan.
Caritasen erakusketa
Azkenik, Bizkaiko Caritasegaz elkarlanean, abenduaren 19an, zapatuan, 10:00etatik 14:00etara, "Begirada aldatuta, etorkizuna aldatuko duzu" izeneko argazki erakusketa ikusi ahal izango da Algortako Telletxe plazan.
Bilbon eta Portugaleten izan den erakusketa hori Caritasen "Argi Ibili" Zurrumurruen Estrategiaren barruan kokatzen da. Udalerriko Zurrumurruen kontrako agenteek informazioa ere banatuko dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.