Arenasek izan du jokoaren kontrola lehenengo ordu erdian. Halere, Portugalete indartsu zelairatu da eta lehenengo aukera garbia Ezkerraldekoek izan dute 33. minutuan, Kortak bota duen penaltian. Orduan ez dute gola sartu, Aitor Etxebarriazarraga atezain areetarrak baloia ukitu eta zutoinera bidali baitu. Baina erasoaldi horren ostean, etxekoen deskoordinazioa etorri da, eta Portugaletek ez du aukera galdu. 39. minutuan, falta baten jaurtiketa baliatu du Galanek atearen aurretik bigarren errematean gola sartzeko, Etxebarriazarragak lehenengo saiakera oztopatu ostean erreakzionatzeko astirik ez baitu izan. Atsedenera 0-1 heldu dira.
Bigarren zatian, Arenasek dena emateko prest atera da eta hainbat erasoaldi egin ditu, baina gola sartu barik. Bitartean, Portugaletek defentsa eta kontraerasoak tartekatu ditu eta aukera izan du partida biribiltzeko Galderren erremate bategaz. Halere, Arenas izan da behin eta berriro hori-beltzen areara sartu dena, erasoaldiak biribildu barik. Zaleek daborduko maiz bizi izan dituzte antzeko egoerak, Amorebieta, Fuenlabrada, Castilla edo Gernikaren aurkako partidatan, adibidez. Eta beldur izan dira, Arenasek mendean hartutako beste dema bat galduko zutelakoan. Horretan zeidela, 82. minutuan heldu da berdinketa-gola. Luisma Villak bota du falta baten jaurtiketa, Ian Urangak errematatu du eta gola Portugaletearen sarea jo du. Handik aurrera talde biak ahalegindu dira hiru puntuak eskuratzen, baina partida berdinketan heldu da amaierara.
Kontuak hala, oraingoz Arenas seigarrena da taulan, 31 puntugaz, kategorian mantentzeko behar izango dituzten 45 bat puntuetatik hurbilago.