"Uso Zuria", "As de Guia VII" eta "Biobizz", Abrako Gizarte Sariaren buru

Iker Rincon Moreno 2016ko urt. 18a, 12:40

Biobizz bela-ontzia artxiboko irudian. © ABRAKO ITSAS ERREGE-KLUBA

Abrako Itsas Errege-klubak antolatuta, 2016ko lehenengo bela-estropadak egin ziren pasa den aste-akabuan itsasadarreko uretan, kirol-taldearen Gizarte Saria dela-eta. Lehenengo itsasaldiaren ostean, Paddy Aldecoaren "Uso Zuria" da sailkapenaren liderra A-B kategorian. C modalitatean, Javier Peñaren "As de Guia VII" da lehenengo sailkatua eta J80 bela-ontzien artean "Biobizz" da burua. Gizarte Sariaren hurrengo etapa urtarrilaren 30ean eta 31n egingo dute.

"Uso Zuria"-k 01.37.38 denbora behar izan zuen 9 itsas-miliak egiteko. Minutu batera geratu zen Lorenzo Mendietak gidatutako "Ashandar WOP", eta hirugarrena Juan Valdiviaren "Gaitero" izan zen, 01:15era.

C modalitatean, 7 itsas-miliako ibilbidea egin zuten. "As de Guia VII" irabazlearen ostean heldu ziren Javier Sanchidrianen "Kantarepe Iru" bela-ontzia eta Iñaki Landaluceren "Sandra".

J80 kategorian, azpimarratzekoa da Jose Azquetaren itzulera Abrara, iaz Santanderren munduko hainbat txapeldunakaz lehiatu ondoren. Kontuak hala, Azquetaren "Biobizz" garaipenagaz estreinatu zen itsasadarrean; hiru puntu ditu.

Hurrengo sailkatuak honako hauek dira: Ramon Zubiagaren "Mandovi" (7 puntu), Ibon Basañezen "Jet Set" (12), Alfonso Churrucaren "Alpega" (13), Gonzalo Chavarriren "Fin Gol Fin" (14), Jose Luis Ribed-en "Pilgrim" (15) eta Brais Rodrigoeren "Pakea" (22 puntu).

Kirolak Getxo

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun