Itzubaltzeta/Romoko Errekaganeko eta Fadurako lanak burutu ostean, 100 urteko itzultze aldiko ur-goraldien ur-laminak hartuko duen maila nabarmen jaitsiko dela iragarri dute. Gobelan lanok egin aurretiko egoerarekin alderatuta, ur-laminak 1,44 metro behera egingo du gutxien jaisten den eremuetan; gehien jaisten den horietan, berriz, 2,28 metro egingo du behera, URAko arduradunen arabera. "Ondorioz, herriguneko eremu zabalak ur-goraldi horietatik at geldituko dira".
Lanen eragina Fadurako kiroldegian
Datozen hilabeteotan egingo dituzten obrek hainbat kirol ekipamendu eta aparkalekutan eragina izango dute. Izan ere, lanok daborduko lehenengo afekzioa izan dute zirkulazioan eta Getxo futbol taldearen zelaiko eta kiroldegiko frontoietako aparkalekuetan. Hori dela eta, ahal den neurrian, Fadurara joateko ibilgailuak ez erabiltzeko deia egin dute Getxo Kirolakeko arduradunek. Halaber, padeleko kanpoko hiru zelai zerbitzuz kanpo uztea aurreikusi dute.
Gobela ibaiko ubideratze obrak aurrera egin ahala, Getxo Kirolakek informazio zehatza eskainiko du behin-behineko neurriei eta erabiltzaileei proposatutako hautabideei buruz.