Bart gauean hil da astelehenean Gasteizen gizon batek leihotik behera bota ei zuen 17 hilabeteko haurra. Hilketa horren aurrean, elkarretaratzeak deitu dituzte hainbat tokitako erakunde eta eragile feministek. Tartean, Getxoko mugimendu feministak mobilizazioak deitu ditu bihar arrastirako. Lehenengoa 18:30ean izango da, Areetako Xake plazan. Bigarrena, berriz, Algortan izango da, 19:30ean, Telletxe plazan.
Astelehen goizaldean izan zen ustezko erasoa, Gasteizko Askatasuna kalean. Bertan, Ertzaintzak 30 urteko gizonezko bat atxilotu zuen, 17 hilabeteko haurra leihotik botatzea egotzita.
Hasiera batean gizonezkoa neskatoaren amagaz liskarrean zebiltzala zabaldu zen; gerora, ordea, ikerketa iturriek jakinarazi dute gizona sexu-abusuak egiten zebilkiola haurrari, eta emakumeak harrapatu egin zuela. Ustez, andreari ere eraso egin zion gizonak, kristal bategaz.
Homizidio bat, homizidio saiakera bat eta sexu abusuak egotz diezazkiokete gizonari, baina Ertzaintzak oraindik ez du zehaztu zein delitu leporatutako dioten. Juan Kalparsoro EAEko fiskal nagusiak jakinarazi zuenez, behinik behin 30 urteko espetxe zigorra eska daiteke haren aurka.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
