Getxoko Udalbatzak udal-langileen ordainsariak %1 igotzea onartu zuen atzoko osoko bilkuran. Neurria 2016ko urtarrilaren 1etik aurrerako soldatetan izango du eragina; hala, Eudel Euskadiko Udalen Elkarteak ordainsariei lotutako gomendioa beteko du Udalak. Neurriak alderdi politiko denen oniritzia jaso zuen, EH Bildurena izan ezik, abstenitu baitzen, "%1eko igoera eskasa izateagatik, PPren gobernuak ezarritako %1eko gehitze hori onartzean ausardia gutxi erakusteagatik, eta Eudelek ordainsariak baino ez dituelako kontuan hartu, negoziazio mahaian beste gai batzuk konpondu barik daudelako".
GUK taldeak ere igoera hori nahikoa ez dela eta langileakaz negoziatzen segitu beharra dagoela adierazi zuen. Ciudadanoseko zinegotziak, halaber, "langileek klase politiko zaharrak eman dezakeena baino gehiago merezi" dutela gaineratu zuen.
EAJk eta PSE-EEk osatutako gobernu-taldeak, berriz, gogoratu du %1 hori legeak baimentzen duen gehienezkoa dela eta negoziazio kolektiboan aurrera egiten jarraituko duela.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!