Bihar, otsailak 2, abiatuko dituzte Getxo Antzokia eraikitzeko erabili dituzten garabi bietako bat desmuntatzeko lanak, "eraikinaren ingurua urbanizatzeko lanak aurreratuta baitaude", azaldu dutenez. Garabia fase ezberdinetan desmuntatuko dute, hiru egunean. Egingo diren lanen ondorioz, eta teknika- eta segurtasun-protokoloek ezartzen dutenez, 08:00etatik 18:30era oinezkoen igarotzea eten egingo dute aldizka, obren inguruan: Andres Cortina, Algortako etorbidea, Etxeandia apezpikuaren kalea eta Basagoiti etorbidea kaleetako eta San Nikolas plazako tarte batzuetan, batez ere.
Otsailaren 2tik 4ra iraungo dute lanok. Lehenengo egunean garabi-besoaren bi sekzioak (besoa eta kontrako besoa) kenduko dituzte. Ondoren, dorrearen gainontzeko egiturak kenduko dituzte. Garabia 23 tonatik gorakoa da eta 28 metroko garaiera du.
Egun bakoitzean zehar egoera desberdinak izango direnez gero, baimendun langileek beharren egoera eta handik igarotzeko alternatibak seinalatuko dituzte, sarbideak bermatu eta hiritarrei enbarazuak gutxitzeko.
Egunak eta orduak, halere, aldatu egin daitezke, eguraldiaren baldintzen arabera.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.