"Biobizz", "Uso Zuria" eta "As de Guia VII" Abrako Gizarte Sarian nagusiak

Erabiltzailearen aurpegia Hiruka 2016ko otsailaren 22a

"Uso Zuria" belaontziaren artxiboko irudia. © ABRAKO ITSAS ERREGE KLUBA

Pasa den zapatuan, Abrako Itsas Errege Klubak antolatutako Abrako Gizarte Sariaren hirugarren estropada egin zen. Aurreko saioan ez bezala, kategoria denetan burutu zen proba. Halere, zapatuko estropada bigarren saiakeran egin zen, arrastian eta ipar haizeagaz; hego haizea zebilen goizekoa bertan behera utzi behar izan baitzuen antolakuntzak. Sailkapen nagusian, "Biobizz" (J 80), "Uso Zuria" (A-B) eta "As de Guia VII" (C) izan ziren Abrako Gizarte Sariaren irabazleak.

 

A-B modalitatean, Mikel Emaldiren "Maitena" ontziak irabazi zuen puntuazio bikoitzeko proba. Halere, "Uso Zuria"-k mantendu zuen lehenengo saioan lortutako lidergoa eta garaile irten zen 5 puntugaz. "Maitena" eta Lorenzo Mendietaren "Ashandar WOP" bere atzean sailkatu ziren, 8 puntugaz. Taulan atzerago geratu ziren Juan Valdiviaren "Gaitero" (11 puntugaz), eta Javier Onaindiaren "Symphony".

C kategorian, "As de Guia VII" belaontziak hiru puntuko aldea atera zion Javier Sanchidrianen "Kantarepe Iru"-ri. Azkenik, J 80 modalitatean, Jose Azquetaren "Biobizz" abantaila handia zeukan azken probaren aurretik, eta garaipen argia lortu zuen 6 puntugaz. Bigarrena Ramon Zubiagaren "Mandovi" izan zen, 16 puntugaz, eta podiuma Ibon Basañezek osatu zuen "Jet Set"-ek lortutako 21 puntugaz. Beherago sailkatu ziren Gonzalo Chavarriren "Fin Gol Fin" (22) eta Alfonso Churrucaren "Alpega" (27).

Kirolak Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun