Bizkaitarrek aulki mugikorreko eta traineruen proba konbinatuan marka onena egin zuten. Estropadan, Kantauriko arraun-elkarte garrantzitsuenetako batzuek parte hartu zuten, TKE eta KAE ligetako kideak. Antolatzaileen esanetan, estropadaren marka berria ezarri da, parte hartu duten ontzien kopuruari dagokionez: 28 izan ziren guztira: 21 traineru eta 8+ko 7.
Proban, distantzia luzeko estropada egin zen –igoera-, erlojupekoa, zeinean 8+ modalitateko ontziek 4.000 metroko tartea ibili zuten; traineruek, ordea, 5.000 metro. Banderaren irabazlea Bermeo eta Raspaseko arraunlariek osatutako tandema izan zen, igoera proban denbora onena egin baitzuten bi modalitateetakoak batuz. 8+koan Raspaseko zazpi arraunlari lehiatu ziren, 13.05,48 denboragaz; trainerukoan, ordea, Bermeoko arraunlariek osatu zuten, 16.41,56 markagaz. Aulki mugikorrean hirugarren sailkatu ziren, Deustu eta Getxoren ondotik, eta traineruetan Bermeo izan zen txapelduna, Pasai Donibane eta Portugaleteren aurretik.
Estropada berean VI. Lagar Memoriala abiadura-proba ere jokatu zen, 500 metroko distantzian, modalitate bietan. 8+koan, Raspas-Bermeo bigarren sailkatu zen, Deusturen ondotik eta Getxoren aurretik, eta traineruen esprintean Bermeo ere bigarren izan zen, Pasai Donibaneren atzetik eta Portugaleteren aurretik.