Askapena antolakunde internazionalista "#brigadak2016" izeneko aurkezpen-ekitaldiak egiten dabil Getxon. Hilaren 16an aurtengo brigaden aurkezpena egin ostean, Argentina eta Uruguaiko brigadan egondako kide batek bere esperientziak kontatu zituen Itzubaltzeta/Romon. Horren ostean, internazionalistak Algortara hurbilduko dira aurkezpena egitera, hilaren 23an, hain zuzen ere.
Eguazten horretan, urte honetarako aurreikusita dauden brigadak aurkeztu ostean, Brasilgo Lurrik gabekoen mugimenduko (Movimento dos Trabalhadores Rurais Sem Terra, MST) kideakaz egondako brigadari batek bere esperientziak kontatu, eta mugimendu horren nondik norakoak azalduko ditu. Berbaldia Algortako Aldai Patronatuan (Karitate kalea, 1) izango da, arrastiko 07:00etan.
Askapenakoek azaldu dutenez, brigadetan parte hartu gura dutenek hilaren 31ra arte izena eman ahalko dute.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!