Tomas Sanchez Jimenez getxoztar mendizalearen sendiari doluminak agertu dizkio Imanol Landa alkateak. Domekan hil zen gizona Huescan, 51 urte zituela, Ordesako parkean elur-jausi batek azpian harrapatuta. Bere bikotekideagaz zeharkaldi egiten zebilen. Udal agintari getxoztarrak heriotza deitoratu eta biktimaren sendiari elkartasuna adierazi dio.
Domekan, Pirinioetan, Ordesako parke nazionalean (Espainia) izandako elur-jausi batek 51 urteko Getxoko gizon bat eta beragaz zegoen andrea harrapatu zituen. Emakumea bere kasa atera zen, baina gizona osorik geratu zen elurpean. Erreskate taldeek konortea galduta aurkitu zuten. Helikopteroaren zain zegoela hil zen. Getxoko Udalak gaur jakinarazi duenez, Tomas Sanchez Jimenez zeukan izena.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!