Itzubaltzeta/Romoko Santa Eugenia kalearen atzealdean dagoen aparkalekuko zirkulazioaren noranzkoa aldatuko du Getxoko Udalak. Norabide aldaketa datorren martitzenean, hilak 26, ezarriko dute, ibilgailuen eta oinezkoen zirkulazioa berrantolatu eta errazagoa egiteko, Udalaren arabera. Izan ere, ohartarazi dutenez, bide estuak dituen aparkalekua da, eta ibilgailu eta oinezkoen trafiko handia jasaten du.
Horregatik guztiagatik, martitzenetik aurrera, desagertu egingo dira bi noranzkoak ibilgailuentzat, eta hortaz, noranzko bakarra ezarriko da aparkalekuaren barruko ibilbide osoan (Xake plazaranzkoa). Egun dauden hiru sarbideetatik bi, Santa Eugenia eta Ibaigane kaleetakoak, sartu eta irteteko izango dira, eta hirugarrena, Gobelaurre kalekoa, bakarrik sartzeko erabiliko da.
Aparkaleku kopurua ez da aldatuko (106 plaza arrunt, 4 mugikortasun murriztuko pertsonentzat eta motozikletentzako aparkaleku txiki bat, 2.405metro koadroko azaleran banatuta).
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.