Aljeriako Tinduf herrian dauden Saharako errefuxiatuen kanpamentuen aldeko X. Herri Krosa bertan behera geratu da. Datorren maiatzaren 8an, domeka, egitekoa zen, Algortan, Atfal Getxoko Sahararen aldeko elkarteak eta Getxo Atletismo Klubak antolatuta, eta beste entitate batzuk lagunduta, tartean, Getxoko Udala.
Antolatzaileek jakinarazi dutenez, lasterketa ezin izango da egin, "antolakuntzatik kanpoko arrazoiengatik". Era berean, eragindako eragozpenak barkatzeko eskatu dute.
Urtero legez, irteera eta helmuga Ereagako hondartzan ipintzekoa zen. Bertan hiru proba egin behar zituzten: goizeko 10:45ean, 10 urte arteko neska-mutilek abiatu behar zuten herri-krosa, 600 metroko ibilbidea osatuz; ondoren, 10:55ean, 11 eta 14 urte bitarteko gaztetxoek 1.500 metro izango zituzten aurretik; azkenik, 11:10ean, 15 urtetik gorakoek 8 kilometroko ibilbidea zuten betetzeko. Izen-ematea: Kantxa Kirol Modan, Bikila kirol-dendan eta lasterketa egunean ere egin zitezkeen.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.