Goizean zehar, dozenaka euskaltzale bildu dira Areetako Eskoletako plazan, Egizu Getxo Euskaldun! elkarteak antolatutako Berbodromoaren bosgarren edizioaren harira. Lehenengo saioa goizeko 09:00etan izan da; bigarrena, 11:00etan. Arrastian ere euskaraz berba egiteko aukera izango da, Itzubaltzeta/Romoko poteo gunean, 19:00etatik aurrera.
Saioak ordubetekoak izango dira, eta tarte horretan hiru gai jorratuko dituzte partaideek.
Talde bakoitzak 6 pertsona izango ditu (dinamizatzailea eta bost lagun); hala, gai bakoitzari 15 minutu eskaini ostean, hurrengoari ekiteko parte-hartzaileek mahaia aldatuko dute, berba-kideak aldatu ahal izateko. Aurtengo erronka egun osoan 400 lagun baino gehiago elkartzea izango da; arrastian 100 lagun batu gura dituzte.
Antolatzaileek azaldu dutenez, arrastiko saioan Gure Etxea, La Mona, Arotza eta Museo tabernetan potea euskaraz eskatzen dutenek pintxo bat jasoko dute dohainik.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.