Getxoko Ereaga eta Arrigunagako hondartzek Bandera Urdina izango dute, beste urte batez, ADEAC-FEE, Ingurugiroko Hezkuntzako eta Kontsumitzaileen Elkarteak jakinarazi duenez. Ikur hori, "ingurugiroa eta natura errespetatuz, itsasertzaren eta hondartzen gestioan egindako ahaleginak aitortzeko saria", dela adierazi dute tokiko udal iturriek. ADEAC-FEE elkarteak hiru bandera urdin eman dizkio EAEri: Algortako biei eta Ea udalerrikoari.
Ingurugiroa eta natura errespetatuz, itsasertzaren eta hondartzen gestioan egindako ahaleginagatik ematen diete ikur hori Espainiar Estatuko hondartza eta portu jasangarriei. Bandera Urdinak aurretik ezarritako estandar batzuk bete izana egiaztatzen du, hala nola bainatzeko uraren kalitate ona, garbitasuna, informazioa, ingurugiroko hezkuntza, segurtasuna, zerbitzuak eta instalakuntzak. Bandera Urdinaren azken helburua da turismoaren garapen jasangarria eta hondartzetan eta inguruetan Ingurumenarekin kudeaketa adeitsua lortzea.
Ereagako hondartzan bederatzigarren urtez izango da bandera urdina eta Arrigunagakoan zazpigarrenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.