San Nikolas plazaren erabateko transformazio horrek ezinegona sorrarazi du udalerriko hainbat bizilagunen artean, aurreko plaza gurago zutenen artean, hain zuzen ere. Berbarako, hilaren hasieran, San Nikolas plazaren ondoko Basagoiti etorbideko Ondarreta litxarreria-dendak sinadura-batze bat abiatu du, lehengo plaza berreskuratzea ezinezkoa dela jakinda ere, behintzat lehengo kioskoa berreskuratzeko. Horrez gainera, ekimen horregaz, inguruaren antolaketa auzotar guztien gustukoa ez dela salatu gura dute. Hala, daborduko 1.500 sinadura baino gehiago batu dituzte.
Kartela ere ipini dute Ondarreta litxarreria- dendaren erakusleihoan, eta honela dio: "Anima zaitez sinatzera, eta, bide batez, alkateari eskatzera kioskoa jartzea". Erronka 8.000 sinadura batzea da, gaia Udalbatzara eroan eta bertan eztabaidatu ahal izateko.
Sinadura-bilketaren deitzaileek proposatu dutenez, kioskoa frontoiaren parean jar daiteke, 50eko hamarkadan zegoen bezala. Izan ere, hiru hamarkada beranduago, plazaren zaharberritzeagaz batera, kioskoa enparantzaren erdigunean ezarri zuten, 2010era arte egon zen lekuan, hain zuzen ere.
Kioskoaren gabeziaz gainera, auzokide askoren artean, kritika eragin dute plaza berriaren beste hainbat elementuk, berbarako: hormigoizko eskailerek, bankuek, hesi berriak eta plazaren bazter batean ipini duten erabilera askotariko dorreak.
San Nikolas plaza, 1950eko hamarkadan. © GETXOKO LIBURUTEGIA
San Nikolas plaza, 1990eko hamarkadan. © GETXOKO LIBURUTEGIA
