Datorren ekainaren 4an, zapatua, egingo dute Algortako Lagunarteko Triatloi Oso Herrikoiaren laugarren edizioa. Algortako Gazteak kolektiboak antolatuta, proba Ereaga hondartzatik irtengo da, Ola jatetxearen albotik, 16:15ean.
250 metro igeri egin ostean, bizikletaz 14 kilometro bete beharko dituzte parte-hartzaileek. Ondoren, 1.300 metro korrika egin beharko dituzte, San Nikolas plazara heltzeraino.
Izen-ematea daborduko zabaldu du Algortako Gazteak kolektiboak. Inskripzioa egiteko, ag.kirolabentura@gmail.com posta elektronikora idaztera baino ez da egin behar. Antolatzaileek ohartarazi dutenez, atleta-kopuru mugatua onartuko dute, 50 pertsonentzako lekua baino ez dago-eta.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!