Erasoa goizeko 06:30ean jazo zen; erasotzaileak Algortako metro geltokitik jarraitu zuen emakume gazte bat, hura etxeko aparkalekura heldu arte. Bertan, sexualki eraso egin zion, eta hura defendatzen saiatu izan zenez, aurpegian kolpeak ematen hasi zitzaion, biktimak salatu duenez. Horren ondorioz, emakumezkoa Gurutzetako Ospitalean artatu behar izan zuten.
Biktimak salaketa aurkeztu eta gero, Ertzaintzak ikerketa abiatu zuen, eta ustezko erasotzailea identifikatu eta atxilotu zuen atzo, astelehenean, arrastian.
Erasoaren berri izan ondoren, Udalak gaitzetsi egin zuen bortxaketa, eta bi elkarretaratze deitu ditu gaurko: 12:00etan, udaletxeko eskaileretan; eta arratsaldean, 19:30ean, Telletxe plazako puntu morean. Algortako mugimendu feministak bigarren deialdi horregaz bat egin du.
