Adierazpen instituzionala onartu du Getxoko Udalak, Errefuxiatuen Munduko Eguna dela eta

Iker Rincon Moreno 2016ko eka. 20a, 17:35
Deskargatu Info Ahotsak :
Español English Français Català Galego

Imanol Landa Getxoko alkateak, eta EAJ, PP, GUK, EH Bildu, PSE-EE eta Ciudadanos talde politikoetako ordezkariek osatutako Udalaren Bozeramaleen Batzordeak aho-batez onartu du adierazpen instituzional bat, eta horretan bere egiten du Eusko Legebiltzarrak pasa den maiatzaren 12an errefuxiatuen giza eskubideen defentsaren inguruan onartutako 48/2016 Legez besteko Proposamena, gaur, ekainaren 20an, ospatzen den Errefuxiatuen Munduko Eguna dela eta.

Adierazpen instituzionala:

  1. Gogoratzen du errefuxiatuek miseriatik, askatasun-faltatik, indarkeriatik, gerretatik eta giza eskubideen urraketetatik egiten dutela ihes. Horregatik, Europar Batasunari eta haren estatu kideei premiazko erantzun humanitarioa exijitzen die. Erantzun horren oinarri izango dira asilorako nazioarteko Zuzenbidea, nazioarteko hitzarmenak eta Europar Batasuneko Oinarrizko Eskubideen Gutuna.
  2. Erabat gaitzesten du eta salatu egiten du EB-Turkia akordio lotsagarria, nazioarteko arau anitz urratzen dituena giza eskubideen eta migratzaile edota errefuxiatuen eskubideen arloan, eta, zentzu horretan, Europar Batasunari eskatzen dio akordio hori indargabetu dezala.
  3. Nazioarteko eta etorkinei buruzko politika komun bat defendatzen du, asiloaren eta giza eskubideen gaietan arduratsua izango dena.
  4. Zeharo arbuiatzen ditu Batasuneko zenbait estatuk mugak itxi izana eta errefuxiatu-eremuetan egindako atxiloketak.
  5. Bat egiten du "Pasabide segurua" manifestuarekin, eta eskatzen die bai Europar Batasunari eta bai haren estatu kideei korridore humanitarioak sor ditzatela, ahalbidetuko dutenak migratzaile eta errefuxiatuak Europara sartzea.
  6. Europar Batasunari eskatzen dio ahalegin guztiak areagotu ditzala desagertutako milaka ume errefuxiatuak aurkitzeko.
  7. Espainiar Gobernuari exijitzen dio, ahalik eta azkarren, 15.000 pertsona jasotzeko bere konpromisoa, eta gogoratzen dio asilo-eskubidea unibertsala dela, jatorriko herrialdea edo penintsulara sartzeko bidea edozein direlarik ere.
  8. Eusko Jaurlaritzari eskatzen dio inplikatutako erakunde guztiekin elkarlanean jardun dadila, errefuxiatuek Euskadira iristeko aukera izan dezaten eta zerbitzu zein baliabide publiko guztietara iritsi ahal izan daitezen, horrela harrera integral bat bermatuz.
  9. Aitortu eta eskertu egiten du GKEek eta gizarte zibilak egindako aparteko lana errefuxiatuen eskubideen defentsan, bai maila lokalean bai hainbat errefuxiatu-eremutan.
  10. Onartzen du legebiltzar-talde arteko bat berehala eratzea, migratzaile eta errefuxiatuen eskubideen defentsarako, datozen legealdietan ere jarraipena izango duena, sortutako beste taldearteko batzuekin gertatzen den bezalaxe.
  11. Erabaki hau igortzen die Europako Batzordeari eta Parlamentuari, Espainiako Gobernuari eta Eusko Jaurlaritzari".
Politika Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun