Datorren asteko zapatuan, irailak 17, Ur Jaialdiaren hirugarren edizioa hartuko du Algortako Arriluze kaia eta Kirol Portuaren inguruak. Getxo Kirolak udal erakundeak koordinatuko du ekimena, Getxoaktibatu! dinamizaziorako udal-programaren barnean kokatuta. Ur-kirolei lotutako udalerriko hainbat klubek doako eskolak emango dituzte, eta haietan parte hartzeko izena eman beharra dago, leku kopurua mugatua baita.
Itxas-Dive urpekaritza klubak urpean tutuagaz igeri egiten ikasteko eskola emango du; Pakea Getxo bela-eskolak bela ezagutzeko klaseak emango ditu; Getxo Kayaka piraguismo-klubak ere gauza bera egingo du kayakeko eskolakaz, eta Northwind elkarteak paddle-surf klaseak eskainiko ditu. Eskoletan parte hartzeko 8 urte beteta eduki beharko da.
Horrez gainera, Arriluzen karpa bat ipiniko da informazio-gune bategaz, eta gune horretan arku-tiro eskolak eta haurrentzako hainbat ekintza antolatuko dira 11:00etatik 14:30era arte. Irekiak izango dira eta ez da aldez aurretik izenik eman behar.
Interesa duten guztiek eskola horietako edozeinetan eman dezakete izena edo informazio gehiago eskatu honako helbide elektroniko honetan: getxoaktibatu@getxo.net.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
