Etxebizitza librearen prezioa %1,7 merkatu da EAEn urteko bigarren lauhilekoan, aurreko urteko aldi beragaz alderatuta. Aitzitik, Espainiako Sustapen Ministerioak jakinarazi duenez, Espainiar Estatuan %2,2 igo da etxebizitza librearen prezioa; hala, metro koadro bakoitzeko 1.506,4 euroraino ordaintzen da. Getxon, berriz, 2.645,3 euro ordaintzen dira metro koadroko, eta Estatuko etxebizitza libre garestienak dituzten udalerrien artean laugarrena da.
Sustapen Ministerioak 25.000 biztanle baino gehiago dituzten udalerrietako etxebizitzen prezioa aztertu du. Zerrenda horren buru Donostia dago berriro, eta, ondorioz, Estatuko etxebizitza libre garestiena duen hiria da (3.132,1 euro/m2), Estatuko batez bestekoaren bikoitza baino gehiago (1.506,4 euro/m2).
Gipuzkoako hiriburuaren atzetik, Eivissa (2.689,8 euro/m2) eta Bartzelona (2.656,5 euro/m2) ageri dira, eta Getxo da zerrendan laugarrena (2.645,3 euro/m2).
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
