Nafarroako Baztan Abentura jolas-parkean erorketa larri baten ondorioz hil zen getxoztarraren istripua argitzeko epaiketa egin dute gaur, Iruñeko Zigor-arloko 4. Epaitegian. Alde biak akordio batera heldu dira; ondorioz, akusatuak urte biko espetxe zigorrari aurre egin eta hildakoaren familiari 176.262,72 euroko kalte ordaina ordaindu beharko dio, EFE albiste agentziak zabaldu duenez. Halere, akusatuak aurrekaririk ez duenez, ez du espetxera joan behar izango.
Diego Lastra Gutierrezek 40 urte zituen 2015ean Baztan Abentura Parkean, Elizondotik gertu (Nafarroa), 100 metroko altueratik erorita hil zenean. Ezbeharra "Pendulua" izeneko atrakzioan gertatu zen.
Foruzaingoak ezbeharraren nondik norakoak ikertu ondoren, hildakoari beharrezko segurtasun soketako bat jarri ez ziotela ondorioztatu zuen. Hori dela eta, zuhurtziagabekeriazko hilketa delitua egotzi zioten atrakzioaren arduradunari.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!