Gurasoek seme-alaben heziketa errazten duen formazio egokia jasotzea ahalbideratzeko, Guraso Eskolaren tailer berriak antolatu ditu ikasturte honetarako Getxoko Udalak. Doako tailerron helburua da bizimodu osasuntsuak sustatzen ikastea, mendekotasuna sor dezaketen jarreren aurrean. Urriaren 4an, martitzenean, hasiko dira saioak, eta udalerriko eskoletako Haur Hezkuntzako, Lehen Hezkuntzako eta Bigarren Hezkuntzako ikasleen gurasoei zuzenduta daude.
Urritik urtarrilera bitartean izango diren tailerren gaiak ondokoak izango dira: emozioen kontrola eta estresaren erabilera, adimen emozionalaz hezi, autoestimua familian hobetu, familian gatazkak nola konpondu, psikologiaz hezi, zigortu gabe hezi, sexualitateaz solasean, eta nerabeekin gatazkak nola konpondu. Hiru, lau edo bost saioko ikastaroa izan daiteke, ikastetxe desberdinetan, eta ez dago aurretik izena eman beharrik; nahikoa izango da ikastaroaren lehenengo egunean agertzeagaz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!