Zapatuan, hilaren 15ean, hasiera emango diote haurdun daudenentzat eta haurtxoentzat antolatutako uretako doako jardueren denboraldi berriari. Getxo Kirolak-ek antolatuta, abonatuentzat zuzenduta dago, eta aurten, gainera, zapaturo eskainiko dituzte goizez, Gobelako igerilekuan. Hala, erditze aurreko eta ondorengo saioak 09:30etik 10:10etara izango dira; haurtxoena, berriz, talde bitan banatuko dira: 10:15etik 10:35era (6 eta 18 hilabete arteko haurtxoak) eta 10:40tik 11:00etara (18 eta 36 hilabete arteko haurtxoak).
Horrez gainera, hilabete bakoitzeko azken domekan, Fadurako igerilekuetan hainbat jarduera ludiko izango dira 4 urte bete dituzten haurrentzat (gutxienez heldu bategaz joan beharko dute). Lehen hitzordua urriaren 30ean izango da, 10:00etatik 11:00etara.
Gomendioei dagokienez, komenigarria da parte hartu gura duten emakume haurdunek zerbitzu medikoen oniritzia izatea. Haurtxoek bainu-txanoa, uretako oihala, bainujantzia eta flotatzen duen jostailuren bat eraman beharko dituzte.
Interesatuek izena eman dezakete Faduran (94 430 80 70) edo Gobelan (94 404 51 51) herritarrak artatzeko dauden bulegoetan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.