Algortako Bertsolari Eskolak (ALBE) antolatuta, Anjel Mari Peñagarikano eta Millan Telleria bertsolariek euren eskarmentu handia erakusteko aukera izango dute bariku honetan, azaroak 11, Algortan. Bihotza Gazte bertso-festaren 14. edizioaren osagai nagusiak izango dira Albizturgo bertsolari bi beteranoak, baina inondik inora ez dira osagai bakarrak izango. Musika giro ederra ere egongo da, aurton, Azebarri euskaltzaleon kultur txokoan (Euskal Herria, 14-16) izango den Bihotza Gazte saioan; Oxabi taldeak joko baitu. Hitzordua gaueko 9:00etan da; sarrera doan.
"Argi dago zer ezkutatzen den 'bihotza gazte' hitz jokoaren atzean: adinean gora joan arren, bihotzez oraindino ere gazte dauden bertsolarien ordua", Algortako Bertsolari Eskolak dioenez. Baina, ALBEko kideen berbetan, helburua ez da hainbeste makina bat plaza zapaldutako bertsolariei plaza gehiago ematea, "baizik eta gure eskolako eta eskualdeko gazteei etorri itzela duten beterano horiekaz ikasteko eta gozatzeko aukera ematea".
Ekitaldi hori aspaldikoa dugu, baina azken urteotan bertsosaioa gehi erromeria formula egonkortu da, eta bertsolarien izenak urtetik urtera aldatzen diren arren, azkenaldion erromeria Anjel Larrañaga bertsolari azkoitiarraren eta haren Kupela musika-taldearen esku geratu da; aurten Oxabik joko du.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.