Euskarak 365 egun

Euskarari gorazarre egiteko egunak hasiko dira gaur Getxon

Iazko ekimena Euskararen Egunean, Algortako San Nikolas plazan.

Hilaren 1ean, eguenean, Argia Ereiten Euskara Saria banatuko dute; zapatuan, abenduaren 3an, ostera, hainbat ekitaldi egongo dira Algortako San Nikolas plazan.

Urtero legez, euskarari gorazarre egingo diote getxoztarrek egunotan. Horretarako, Getxoko Udalak, bertoko euskalgintzan lan egiten duten elkarteek eta eskolek hainbat ekitaldi antolatu dituzte, abenduaren 1etik 3ra bitartean. Hala, lehenengo egunean, eguenean, euskaltegietako ikasleek armosua eta merienda egingo dituzte Azebarri kultur elkartean; modu berean, egun horretan, Goñi familiak kudeatutako GetxoGaso gasolindegiak Argia Ereiten Euskara Saria jasoko du, euskararen erabileragaz erakutsitako konpromisoagatik.

Hurrengo egun bietan, berriz, ekitaldi nahiko egongo dira Algortan, Areetan eta Itzubaltzeta/Romon, herritar guztien gozamenerako; zapatuan, Euskararen Egunean, berbarako, euskara nagusi izango da Algortako San Nikolas plazan: Musikaliaren kontzertua, Aixerrotako ikasleen flashmoba, bideo-proiekzioa, kale-animazioa...

Egitaraua

Abenduak 1, eguena

  • 20:00 Argia Ereiten Euskara Saria emango dute, Fadurako Areto Nagusian.

Abenduak 2, barikua

  • 13:00 Umeentzako jolas musikatuak, Areetako Eskoletako plazan.

Abenduak 3, zapatua

  • 11:00 "Zurekin euskaldunago" post-it ekimena, Bizarra Lepoanek antolatuta, Itzubaltzeta/Romon.
  • 12:00 Dantza-kalejira, Itxartu elkartearen ekimenez.
  • 19:00 Ikastetxeak dantzan bideoa, San Nikolas plazan.
  • 19:15 Txantxangorriaren bila lehiaketaren sari-banaketa, San Nikolas plazan.
  • 19:30 Kontzertua, San Nikolas plazan.
  • 20:00 Flashmoba, San Nikolas plazan.
  • 20:30 Txokolatea banatuko dute hurreratzen direnen artean, San Nikolas plazan.
  • 20:30 Kale-animazioa, Musikaliagaz.
  • 20:30 Kantu-jira Itxas Argia eta Itxakantu taldeen ekimenez.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun