Getxoko Udalak 1936ko gerran, aurreko gatazka zibiletan eta frankismo garaian udalerrian izandako biktimei omenaldia egin zien zapatuan, 2009ko ekaineko osoko bilkuran aho batez adostutakoa betez. Ekitaldia Galeako ibiltokian jarritako "Liburuaren oroimena" izeneko eskulturaren ondoan egin zuten, zazpigarrenez.
Bertan, bi txistularik "Agur jaunak" jo dute, hurbildutakoak minutu batez isilunean izan dira eta alkate getxoztarrak lore-eskaintza egin du. Omenaldian biktimen senitartekoak, udalerriko herritarrak eta Getxoko Udalbatzan ordezkaritza duten talde politiko guztietako (EAJ, PP, EH Bildu, Ciudadanos, GUK eta PSE-EE) ordezkariak izan dira, Imanol Landa alkatea buru izan dela.
2009ko ekainean osoko bilkuran aho batez hartutako akordioarekin bat etorriz, aipatutako biktimei errespetua, oroitzapena eta bihotz-bihotzetiko omenaldia aitortu zaie jendaurrean, adiskidetasuna eta elkartasuna giltzarri dituen aitorpen publikoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
