Getxoko Udalak ia 1,1 milioi euro banatuko du kirol-taldeen artean

Hainbat neska, gimnasia egiten. © GETXOKO UDALA

Etzi, astelehenean, Getxo Kirolak udal-erakundeak irekiko du epea udalerriko klubek eta kirolariek aurtengo diru-laguntzak eska ditzaten. Denera, 1.095.000 euro emango dizkiete kirol-elkarteei, euren ohiko jardueran laguntzeko, eta banakako lehiaketetan diharduten errendimendu handiko udalerriko kirolariei.

Aurreko urteotan legez, deialdi bakarrean bateratu dituzte kirolari eskainitako laguntza denak. Horretarako, honako zazpi diru-laguntza lerroak ezarri dituzte:

  • Denboraldiko lehiaketetan parte hartzen duten klubak eta banakako probetan parte hartzen duten kirolariak (475.000 euro).
  • Udalerrian kirol-gertaerak antolatzeko (307.000 euro).
  • Udalerri mailako kirol-eskolak, oinarrizko kirola sustatzeko Getxo Kirolakegaz hitzarmena sinatuta dutenak (223.000 euro).
  • Herri-kirol tradizionaletarako (66.000 euro).
  • Fase finaletan parte hartzeagatik sortutakoak (10.000 euro).
  • Arrisku-kirola eta abenturazkoa (7.000 euro).
  • Jaietan kirol-jarduerak antolatzeko (7.000 euro).     

Diru-laguntza horiek denak emateko hainbat balorazio-irizpide hartuko dute kontuan; besteak beste, emakumeen kirolaren sustapena, ezgaitasunen bat duten pertsonentzako jarduerak antolatzea eta kluben inplikazioa udalerriko kirol-politikan, eskola-kiroleko programen bitartez.

Interesa duten klubek eta pertsonek kontsulta ditzakete deialdiaren oinarriak eta eskabideak aurkezteko epeak hemen.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun