Getxo udalerriko zenbait kirol klubek, Getxo Kirolak udal-erakundeagaz elkarlanean, 14 kirol-campus eskainiko dituzte Aste Santuan, 3 eta 18 urte bitarteko eskola-umeei eta gazteei zuzenduta; honako modalitate hauetaz gozatu ahal izango da campusetan: gimnastika erritmikoa, askotariko kirola, saskibaloia, igeriketa, tenisa, futbola, irristaketa, boleibola eta errugbia. Fadura, Gobela eta Andra Mari udal-kiroldegietan egingo dira aipatutako kirol-jarduera denak.
Getxo Kirolak udal-erakundeko arduradunen ustez, "aurten ondutako eskaintzaren barruan bi dira, batez ere, nabarmentzeko campusak: xakearena, tresna pedagogiko eta sozialitzaile legez Getxo Xake Klubak antolatzen duena; eta Haszten elkarteak proposatu duen kirol-egokitu inklusiboaren campusa".
Kirol-campusak eskolako opor garaian antolatuko dira, "herriko umeei aisialdirako aukera osasuntsuak eskaintzeko eta, aldi berean, gurasoei laguntzeko familia eta lan-bizitza bateragarri egiten".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
