Jendartea  Getxo 2017-05-10 12:50

Gazte bat atxilotu dute Algortan hainbat ibilgailutan kalteak eragin eta lapurtzea egotzita

Getxoko Udaltzaingoak 19 urteko gazte bat atxilotu zuen atzo, martitzenean, Algortan, bost ibilgailutan eta hiru motozikletatan kalteak eragitea leporatuta. Udal-iturriek jakinarazi dutenez, gainera, horietariko bitan objektuak lapurtu ei zituen, baita farmazia baten kristalean eta beilatoki bateko argiztapen foku batean kalteak eragin ere.

Atzo goizeko 06:45ak aldera, Udaltzaingoak dei bat jaso zuen, Algortako Ollarretxe errepideko 23. zenbakian aparkatuta zeuden anbulantzia biren kontra harri bi bota zituen gazte bat zegoela abisatzeko. Ondoren, beste auzokide batek deitu zuen, pertsona bat Fadura inguruan aparkatutako ibilgailuen kristalak apurtzen zebilela esateko.

Patruila bi bertaratu ziren, eta gazte bat topatu zuten bertan. Berak agenteak ikusi orduko objektu bat bota ei zuen lurrera, antza, kristala apurtu zuen kotxe batean lapurtutako txartel-zorroa. Poliziek irrati-kasete baten karatula ere atzeman zioten gazteari, "ziurrenera kristala apurtu zuen beste auto batena", zabaldu dutenez.

Agenteek ingurua miatu zuten eta beste hiru auto kaltetuta eta hiru motozikleta lurrean botata aurkitu zituzten, eta baita farmazia bateko erakusleiho batean eta beilatoki bateko lorategi baten fokuan kalteak ere.

Udaltzainek gaztea atxilotu zuten, hainbat objektu eta abisuan emandako deskribapenaren jantzi eta ezaugarri fisikoak zituelako. Hainbat kalte eta indarkeriaz egindako lapurreta bi egotzi dizkiote gazteari.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa