Getxoko Udalaren arabera, eragile sozial guztien eginbeharra da bestelako gizartea sortzea, errespetutsuagoa, justuagoa eta integratzaileagoa. Horretarako, "gure lan-agendetan konpromiso esplizitua hartu behar dugu LGTBI kolektiboarekiko, aurrera egin dezagun kolektibo horrek sufritzen dituen mota desberdinetako diskriminazioen aurka", azaldu dute.
Horregatik guztiagatik, Getxoko Udalak, EAJ, GUK, EH Bildu, PSE-EE eta Ciudadanos alderdien aldeko botoakaz, eta PPren abstentzioagaz, konpromisoa bere egin du eta LGTBI kolektiboari informazioa eta laguntza ematekoa izanik, gizarte osoa animatu gura du kolektibo horren aldeko konpromisoa hartzera, hau da, sexu‑ eta genero-aniztasunari buruzko kontuak lantzera, bai eta helburu hori gizartearen eremu guztietan gauzatzeko behar diren baldintza egokiak sortzera ere.
Getxoko Udalak LGTBI eskubideak bermatzeko politikak ere bultzatuko ditu. Bide batez, gizarte eredu justu eta anitz baten alde lan egingo duela iragarri du, "homofobia, lesbofobia, bifobia eta transfobia amaitzeko lan egiten duten pertsona eta eragile guztiakaz batera".