Izan ere, getxoztarrek jarraipena eman gura diote Getxoko Aixerrota Boleibol Kirol Taldearen bolada onari. Orain dela aste batzuk, taldeak Plentzian lortu zuen brontzea, Euskadiko 21 urtez azpiko Hondartza-boleibol Txapelketan, Maider Santxo Soto eta Katalin Garcia Lopategi bikoteari esker.
Daborduko, beste hiru metal jantzi dituzte beste txapelketa bitan: maiatzaren bukaeran, bikote berak irabazi zuen 19 urtez azpiko Euskadiko Txapelketa, Sestaoko La Benedicta kiroldegian. Gainera, set bat ere galdu barik lortu zuten balentria.
Bide horri eutsiz, Aida Etxebarria eta Nerea Izaguirre Getxoko Aixerrotako jokalariak ere nagusitu ziren Euskadiko Hondartza-boleibol Txapelketan, ekainaren 11n, Donostiako Zurriola hondartzan. Galdakao Boleibol Taldean hezitako bikoteak senior mailan lortu zuen txapelketa. Halere, talde getxoztarrak ez zituen bakarrik Hego Uribeko fitxaketak zelairatu. Eurekaz batera, Santxo eta Garcia ere lehiatu ziren; horiek hirugarren lekuan geratzea lortu zuten. Donostian, Etxebarria eta Izaguirre euren arerioen oso gainetik ibili ziren, eta set denak irabazi zituzten. Finalean ere, 2-0 nagusitu zitzaizkien Nerea Ruiz eta Ohiane Gutiérrez Sestaoko jokalariei: lehenengo setean, 21-19, eta bigarrenean, 21-15.