Datorren astelehenean, irailaren 4an, Itzubaltzeta/Romoko Santa Eugenia plazan dagoen hesiaren perimetroa zabalduko dute, Romo Kultur Etxeko ingurunea egokitzeko lanakaz jarraitzeko. Hala, Udalak jakinarazi duenez, plazaren zati handi bat okupatuko da; lurpeko aparkalekuko sarbideak libre utziko dira.
RKEren ingurunea egokitzeko lan horien ondorioz zirkulazio-mozketak izango dira aldiro, berbarako eguen honetan, abuztuak 31, egingo den bezalakoak. Hala, eguenean Aurrezki Kutxa kalean bidea itxiko da ibilgailuentzat, Errekagane eta Kresaltzu kaleen arteko zatian, Santa Eugenia plazan hormigoia botatzeko lanak direla eta. Kalea 08:00etan itxiko da aipatutako lanak amaitu arte (egunean zehar).
Horren ondorioz, ibilgailuek beste kale batzuk aukeratu beharko dituzte ibiltzeko, hala nola, Ezequiel Agirre eta Lope de Vega kaleak. Oinez doazen auzotarrentzat, berriz, bidea zabalik egongo da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
