Getxoko EH Bilduk nabarmendu du etxebizitza-plan bat izatea "ezinbestekoa" dela Getxon. Hala, elkarte zein norbanakoakaz izandako hartu-emanaren ondorioz, hainbat neurri eta politika barnebiltzen dituen plan bat osatu du koalizio abertzaleak.
Azaldu dutenez, plan horrek "indar berezia egin nahi du alokairu duin baten sustapenean. Horregatik neurri ezberdinak planteatzen ditu Getxon alokairuzko etxebizitza parke publikoa osatu dadin, etorkizunean eraikiko diren etxebizitza babestu guztiak alokairuan esleitu daitezen, urteak igaro arren erosteko aukerarik gabe".
Era berean, egun Getxon dauden etxe-hutsen problematikari "aurre egiteko pizgarriak" proposatu dituzte, baita kanona ere, horiek guztiak alokairuan merkaturatu daitezen.
"2016an gure akordioari esker lortu ziren diru-laguntzei dagokionez, horiek mantendu eta sakontzeko apustua egiten dugu, gazte, zein nagusien etxebizitza beharrei behar bezala heltzeko", adierazi dutenez.
Aurrekoez gain Getxon Etxebizitza kolaboratiboaren proiektua (cohousing) martxan jartzeko proposamena egin du EH Bilduk, "belaunaldi ezberdinen arteko bizikidetza aberasgarria bezain aproposa izan daitekeelako bizitzako fase ezberdinetan dauden getxoztarrentzat".