Bertsolari Txapelketa Nagusiko finalaurrekoetan lehiatzeko txartela lortu zuen Jone Uria Albizuri bertsolari algortarrak, Zallako kanporaketan bigarren lotu ostean. Finalaurrekoen hasierako itzuliaren lehenengo saioan kantatu beharko du Uriak, zapatu honetan, urriaren 28an, 17:00etatik aurrera, Bastidako (Araba) udal-kiroldegian; eta lehiakide izango ditu Agin Laburu Rezola, Igor Elortza Aranoa, Jon Martin Etxebeste, Nahikari Gabilondo Mendizabal eta Sustrai Colina Acordarrementeria.
ALBEk hitzordu horretara joateko autobusa antolatuko du: 14:30ean irtengo da Algortako Telletxeko geltokitik, eta 21:00ak inguruan Bastidatik; 10 euro balio du bidaiak eta izena eman daiteke oraindino. Finalaurreko faseak itzuli bi izango ditu; lehenengo itzuliko beste saioak honako hauek izango dira: Irun (azaroak 1), Maule-Lextarre (azaroak 4) eta Durango (azaroak 12).
Autobusez joateko: 605 704 385
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!