Polizia iturriek azaldu dutenez, joan den hilaren 9an salaketa bat jaso zuten Getxoko Ertzain-etxean. Horretan, adineko emakume baten etxetik diru-kopuru jakin bat desagertu zelaren abisua eman zuten. Bestalde, emakumearen bankuko txartel bategaz dirua atera zutela ere salatu zuten; izan ere, iturrien arabera, emakumea ezin da ohetik altxatu gaixotasun larri batek jota dagoelako. Modu horretan 9.000 euro inguru atera zituzten. Gainera, emakumearen etxetik hainbat bitxi ere desagertu zirela salatu zuten.
Horren guztiaren aurrean, Ertzaintzak ikerketa bat abiatu eta dirua eta bitxiak emakumearen zaintzaileak hartu zituela ondorioztatu zuten poliziek.
Ikerketaren arduradunek, besteak beste, egiaztatu zuten ustez lapurtutako hainbat bitxi Getxo inguruan urre salerosketan aritzen diren hainbat saltokitan saldu zituztela.
Horregatik guztiagatik, eta dagozkion frogaketak egin ondoren, ertzainek atzo goizean atxilotu zuten Getxon bertan emakumearen zaintzailea, 27 urteko emakumezkoa, iruzur eta lapurreta delituak leporatuta, eta polizia-dependentzietara eraman zuten.