Neguri eta Zugatzarte inguruetan edukiontziak ipintzeko erabakia hartu du Getxoko Udalak, hondakinak batzeko. Azkenengo asteotan eremu bi horietan egindako azterketak amaituta, Hondakinak Kudeatzeko Foroak erabaki du Negurin eta Zugatzarten zaramaren etxez etxeko batze-sistemaren ordez udalerriko gainerako lekuetan dauden edukiontziak ipintzea, «irisgarritasun, jatorrian biltzeko aukera eta distantzia irizpide berberekin», Udalak azaldu duenez.
Hala ere, jakinarazi dute etxez etxeko batze-sistema ipini ahal izango dela hala gura duten auzuneetan. Hondakinen batzea atezainen bidez eta kaleko edukiontziak kentzeko zerbitzuaz arduratzen diren enpresa bidez koordinatuko da, gaikako batzea areagotzeko, besteak beste. Neurri hori aztertu egingo da, beste jabekideen erkidego batzuetara zabaltzeko, horiek hala eskatuko balute, eta zerbitzu hori ematea bideragarria den jakiteko.
Neguri eta Zugatzarte inguruetan 40 irla ipiniko dituzte. Horietan, honako edukiontzi hauek egongo dira: 53 errefusarentzat, 42 papera eta kartoiarentzat eta beste 41 ontzientzat. Ostera, organikoa batzeko edukiontzi marroia daborduko eskaria dagoen lekuetan kokatu dute, eta apurka-apurka irletan egokituko dute. Hala, udalerrian, 464 irla egongo dira eta 2.341 edukiontzi ipiniko dira, denera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
