LAB sindikatuak azaldu duenaren arabera, enpresak "bazekien" kaleratutako langilea 3 egun beranduago egin behar ziren hauteskunde sindikaletako hautagai bat zela, "eta bere boterea erakutsi nahi izan du bere oinarrizko eskubideen alde jarduten duen oro zer gerta dakioken ohartarazteko".
LAB sindikatuak gertakarien "larritasuna" salatu du: "Langileon oinarrizko eskubideen aurka jotzen dute gertakariok, sindikatze askearen aurka, ordezkatuak izateko eskubidearen kontra... Gure bizi baldintzak hobetzeko eta gure interesak hobeto defendatzeko ezinbestekoa da langile gisa elkartzea, gure batasuna, eta horregatik, hain zuzen ere, segituko dugu enpresa askoren bidegabekeriaren aurka langileen antolatzea defenditzen".
Hori dela eta, kaleratutako langilea berriro lanera bueltatzea eskatu dio LAB sindikatuak Aisibizia Elkarteari, eta, bide batez, "hauteskunde sindikalak hertsapenik gabe eta askatasun osoz burutzen utz diezagula".
Aisibizia Elkartea Getxoko Udalarentzat lanean ari da eta bertako gazteei zuzendutako zerbitzu bat eramaten du: Algortako eta Itzubaltzeta/Romoko gaztelekuak kudeatu, besteak beste.
Lanpostu eskaintza zabaldu du Aisibiziak
Kaleratzea egikaritu eta hurrengo egunetara, Aisibizia Elkarteak lan-eskaintza bat zabaldu du udalerriko gaztelekuen zerbitzurako: koordinadore bat eta 3 dinamizatzaile.