Udal iturriek jakinarazi dutenez, atzo, 06:00ak aldera, ibilgailu batek talka egin zuen Algortako Salsidu kaleko eskailera mekanikoen kontra. Azaldu dutenaren arabera, badirudi autoaren gidariak kontrola galdu, errepideko eskuineko aldean zeuden edukiontzien kontra joan eta eskailera mekaniko bategaz talka egin zuela.
Edari alkoholikoen eraginpean egotearen seinaleak atzeman zizkioten udaltzainek 20 urteko gidariari, eta alkoholaren froga egiteko eskatu zioten. Iturriek azaldu dutenez, gazteak uko egin zion horri eta bide segurtasunaren kontrako delitua egitea egotzita atxilotu zuten.
Polizia-eginbideak bideratzen ari dira eta Getxoko Guardiako Epaitegira bidaliko dira.