Jendartea  Getxo 2018-02-21 13:12

Ibetas estratako erreka bat berreskuratzeko auzolana egingo dute domekan

Ibetas estratako erreka bat berreskuratzeko auzolana egingo dute domekan Ibetas estratan agertutako erreka. © TOSU BETIRAKO | Ikusi handiago | Argazki originala

Getxoko Ibetas estrata inguruan sasiak kendu dituzte udal-langileek, bertatik igarotzen den Sarri errekatxoa agerian utziz. Getxoko Auzokideok eta Tosu Betirako plataformek auzolana deitu dute domekarako, inguru hori berreskuratzeko asmoz.

Aipatutako kolektiboek azaldu dutenez, Venancios exekuzio unitatearen baitan, Getxon dagoen azken erreka urbanoaren "suntsipena" planteatzen du Udalak, inguru horretan etxebizitzak eraikitzea aurreikusita dagoelako. "Gure ondare naturalaren aurka doa berriro ere Udala, ur-emaria babesten dituzten legeak hautsiz", deitoratu dute auzokideek.

"Getxon, tamalez, naturari eraso egitea ohitura bihurtu dute", salatu dute. Horren adibide jarri dute Tosu landa, baita Autozinema eta Iturribarri ere. Izan ere, jakinarazi dutenez, leku horietan ur-azpiko urak "suntsitu" dituzte.

Hori dela eta, Sarri errekagaz berdina gerta ez dadin, Getxoko Auzokideok eta Tosu Betirako taldeek auzolana deitu dute inguru hori garbitzeko eta erreka agerian uzteko, "jendeak horren berri izan dezan". Izan ere, diotenez, "erreka baten alboan ezin da edonola eraiki". Auzolana domekan izango da, 10:30ean. Era berean, naturaren zaintzaren ardura duten erakundeei ere egoeraren berri emango dietela iragarri dute, besteak beste, URA eta Eusko Jaurlaritzaren Ingurumen Sailari, "euren gelditasuna ez dezaten ezjakintasunez justifikatu".

2018/02/25 10:00

Ibetas estrata Getxo

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa