Ekonomia  Getxo 2018-03-09 14:48

Nekazaritzaren alde apustu egitea eskatu dio EH Bilduk Getxoko Udalari

Getxoko EH Bildutik eskari zuzena egiten diote udal-gobernuari: "lehenengo sektorearen inguruan egingo duena ez dadila azterketa soilera mugatu, harago joan dadila".

Nekazaritzaren alde apustu egitea eskatu dio EH Bilduk Getxoko Udalari
Getxoko EH Bilduko zinegotziak nekazaritzari buruzko proposamena aurkeztu dute Algortan. HODEI TORRES - HIRUKA | Ikusi handiago | Argazki originala

Izan ere, 2016ko maiatzean, EH Bildu akordio politiko batera heldu zen Getxoko udal-gobernuarekin; bertan, Getxoko lehenengo sektorearen azterketa egitea jaso zen. 2018ko urtarrilean, horren inguruan egindako emaitzak ezagutu ziren.

Azterketak proposatu dituen neurri estrategikoak, besteak beste, honako hauek dira: baratze eta lur eskasiari aurre egiteko neurriak martxan ipintzea; instituzioen eta ekoizleen arteko harremanak sendotzea; azoka bezalako merkataritza- eta banaketa-guneak hedatzea; kontzientziazio-dinamikak martxan jartzea herritarren artean eta sektorearen saretzea.

Nerea Guijarrubia zinegotziak adierazi duenez, "egindako azterketa lehenengo sektore ahul baten erradiografia da; izan ere, urteetan ez da politika bat bera ere egon herriko lehenengo sektorea sustatze aldera. Gainera, gure jendartean dabilen joera azaltzen da bertan: bertokoa eta osasuntsua jateko gero eta ohitura handiagoa, alegia".

EH Bildutik aitortu dutenez, "ezinbestekoak dira lur-arazoa konpontzea eta lur urbanizagarrien deskalifikazioa, horietako asko lehenengo sektorearen garapenera bideratu ahal izateko". Bestetik, eskatu dituzte bertoko produktuen kontsumoa eta jaki ekologiko eta osasuntsuen mezua zabalduko duten kontzientziazio-kanpainak Udalak berak ere egin ditzan.

Hala, EH Bilduk eskatu dio udal-gobernuari: "lehenengo sektorearen inguruan egingo duena ez dadila azterketa soilera mugatu, harago joan dadila; egin dezala apustu lehenengo sektorea garatzearen alde, herri denek, eta Getxok ere, ezinbestekoa dute eta".

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa