Gazteen etxebitza-arazoak gainditzeko proiektua aurkeztu du Getxoko EH Bilduk

Nerea Guijarubia eta Ibon Rodriguez, Getxoko EH Bilduko zinegotziak.

EH Bilduk etxebizitza kolaboratiboa sustatzeko egitasmoa aurkeztu du Getxon. Helburua da bizilagunek espazioak partekatzen dituzten etxebizitza-eredu berriak zabaltzea; hau da, bakoitzak bere espazioa dauka, baina espazio komunitarioak ere badaude.

Nerea Guijarrubia zinegotziak adierazi duenez, “guk gazteentzat proposatzen ditugu etxebizitza hauek, emantzipazioaren inguruan bizi duten arazoari aurre egin nahian. Etxebizitza kolaboratiboak egokiak dira kolektibo bat baino gehiagorentzat; guraso bakarrentzat edota pertsona adinduentzat, esaterako”.

Joan den urtean, EH Bilduk etxebizitza-plana aurkeztu zuen. Bertan honako neurriak azaltzen ziren: alokairurako diru-laguntzak indartzea; Udala promotore izatea alokairu sozialeko etxebizitzetan; etxebizitzak birgaitzeko diru-laguntzak; etxebizitza-eredu berrietaranzko urratsak ematea; eta horien artean kokatu zuten gazteentzako etxebizitza kolaboratiboen proiektua.

Gazteek euren iritzi eta ekarpenak egiteko fase bat zabaldu gura du EH Bilduk, sare sozialen bidez, besteak beste.

Etxebizitza kolaboratiboen ezaugarriak

EH Bilduk azpimarratu duenez, abantaila ugari eskaintzen dituzte etxebizitza kolaboratiboek: “Alde batetik ekonomikoak, etxeko fakturak partekatzean bizilagunek gastu gutxiago izango dituztelako. Bestetik, ingurugiro-abantailak, kontsumoa partekatzeak energiaren erabilera optimizatzen duelako. Eta azkenik, sozialak azpimarratu nahi ditugu, biztanleek hobeto kontziliatu ditzaketelako bizitza pertsonala, familiarra eta profesionala”.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun