Igogailu berria ipiniko dute Algortako Arene eta Areneondo kaleak lotzeko

Igogailu bertikal berriak 16 lagunentzako lekua izango du barruan, 8,7 metro igoko ditu aipatutako kaletik Arene parke inguruan egiten ari den oinezkoentzako ibilbidera, auzoan eraikitzen ari den urbanizazio berriaren ondoan. Areneondo kalean, metroko trenbide azpian dagoen beheko pasabidearen ondoan kokatuko da, Alango kaleagaz lotzen diren hiru igogailu publikoen behealdean, 2011az geroztik zerbitzua ematen dutenak.

Ekipamendu berriak Alangoko hiru igogailuen lerrokadura, estetika eta argiztapena gordeko ditu, baita goiko geralekura sartzeko pasagunearen diseinu eta tipologia ere. Horrez gainera, oinezkoentzako pasarela panoramiko bat ipiniko da, Areneondo kaleko espaloia igogailu berriaren goiko sarbideagaz lotuko duena, baita oinezkoentzako ibilbide berria ere, 5 metroko zabalerako eskailera bat, igogailuaren desnibel berdina igaroko duena, eta pasarela panoramikoagaz paraleloan izango dena.

Igogailu berriaren ordutegia gainontzeko igogailuen berbera izango da, hau da, 05:45etik 24:00etara.

Lanak Pazko Astearen ondoren hasiko dira eta egiteko epea bost hilabetekoa izango da.