Kultura  Getxo 2018-05-23 13:29

Algortako jai batzordea San Inazio festen irudiaren bila dabil

Uztailaren 28tik 31ra bitartean ospatuko dira aurten Algortako San Inazio jaiak. Hain zuzen ere, horien irudia izango dena aukeratzeko, kartel lehiaketa deitu du Algortako jai batzordeak, urtero legez. Irabazleak 300 euroko saria jasoko du.

Algortako jai batzordea San Inazio festen irudiaren bila dabil
Kuadrillen jeitsieragaz emango diote aurten ere hasiera ospakizunei, artxiboko irudia. | Ikusi handiago | Argazki originala

Parte-hartzaileak

Edozeinek parte har dezake eta gaia librea da. Egile bakoitzak lan bakarra aurkez dezake.

Kartelen ezaugarriak

Kartelek DIN A3 (29,7 x 42 zentimetro) neurria (ez-etzana) eduki beharko dute. Gaia librea bada ere, ondoko goiburuak jarri beharko dira, derrigorrez:

  • Algortako Saninazioak 2018
  • Uztailak 28-31
  • Jaietan ere euskaraz!

Beharrezkoa da CDa aurkeztea kartelakaz batera, horien irudi digitalizatuagaz. Bestalde, jakinarazi dute ez dutelako mezu edo irudi sexistarik, homofoborik, arrazistarik edo xenofoborik daukan kartelik onartuko; lan horiek lehiaketatik kanpo geldituko dira zuzenean.

Aurkezteko epea

Ekainaren 28ra arte, Algortako kultur etxean (Villamonte kalea, A-8). Ordutegia: maiatzean, 08:30-14:30 / 16:00-18:00, astelehenetik eguenera; eta 08:30-14:30, barikuetan. Ekainean, 08:30-14:30, astelehenetik barikura.

Kartelak zelan aurkeztu

Kartelei ez zaie ipiniko egilearen izenik, ezta CDei ere; bakar-bakarrik goiburua jarriko zaie. Horregaz batera, goiburu berbera daraman kartazal bat aurkeztuko da, eta barruan egilearen izen-abizenak, helbidea, telefono zenbakia eta helbide elektronikoa.

Herri-bozketa

Ekainaren 30ean, 12:00etatik 14:30era, lehiaketara aurkeztutako kartel denak egongo dira ikusgai, San Nikolas plazako frontoian. Gogokoena bozkatzeko gerturatu ahal izango dira herritarrek.

Saria

Kartel-lehiaketaren irabazleak 300 euro jasoko ditu eta jaietako irudia (liburuxketan, karteletan...) izango da bere lana. Zehaztasunak irabazleari jakinaraziko zaizkio. Saritu barik geratzen diren kartelak, ostera, egileei itzuliko zaizkie.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa