Kultura  Getxo 2018-06-08 12:40

Zapatuko jaialdia bertan behera utzi behar izan du Garrobik

Garrobi Getxoko Artisten harrobiak "atsekabez eta haserre" jakinarazi du zapatu honetan egin behar zuen jaialdia bertan behera utzi behar izan duela. Getxoko Babes Zibilak adierazi die egun berean Algortako Biotz Alai plazan beste ekitaldi bat dagoela eta, ondorioz, San Nikolas plazan ezin da jarduerarik egin.

Zapatuko jaialdia bertan behera utzi behar izan du Garrobik
GART jaialdia, 2015ean. © GARROBI | Ikusi handiago | Argazki originala

Artista getxoztarren kolektiboak kritikatu duenez, "astelehenean bertan, ekainaren 4an" jakinarazi zien Getxoko Babes Zibilak ekitaldia ezin zutela egin: "Garrobik agiriak aurkezteko epeak bete arren, astelehenean udal-bulegora joan ginen arte ez zuten eskaera irakurri. Hala, egun horretan bertan esan ziguten zapatuan beste ekitaldi bat dagoela Biotz Alai plazan. Jarduera horren autobabes-protokoloaren arabera, Biotz Alai ebakuatu behar izatekotan, San Nikolas plaza da batzeko-lekua. Beraz, bertan ekitaldirik ezin daitekeela egin diote", azaldu dutenez.

Udaleko hainbat sailegaz berba egin arren, irtenbiderik ez dute aurkitu. Gauzak horrela, data berriak aztertzen dabil Garrobi, jaialdia egiteko. Zapatuan, ekainaren 9an, San Nikolaseko tabernetan pote batzuk hartzera deitu dituzte artistak eta saltoki laguntzaileetako arduradunak; 13:00etan elkartuko dira.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa